Presentazione DATTULI il libro di Palma Mineo

Lu parlari sciotu di la terra mia,
mi pari tra li tanti lu chiù beddu;
lu sentu comu duci miludìa,
armuniusu comu cantu di ‘n aceddu.

E provu gran duluri nta lu pettu
pinsannu chi ora vinni abbannunatu;
cca, nun si parla chiù di stu dialettu
e quasi pi vivogna sta di latu!

Lu picciriddu spissu è amminazzatu
si parla cu ‘i cumpagni ‘n sicilianu,
pari avissi fattu un gran riatu,
scurdannu di parlari in “italianu”.

Ma pi furtuna, stiornu comu aeri,
chini d’amuri e cu tantu ‘ntillettu,
nàscinu figghi saggi e battaggheri,
chi ancora dannu forza a stu dialettu.

Appena nuzzintedda e fu turmentu!
Tu nun mi duni paci né risettu,
mi sentu comu rosa ‘n facci a ‘u ventu,
cu ‘na pungenti spina nta lu pettu.

Però, jò, essennu un tipu battaggheru,
statti sicuru chi ‘un t’‘a dugnu vinta,
mi cogghiu li me’ forzi e pi daveru
jò ti dimostru tutta la me “grinta.”

Nun ci pruvari chiù, ti raccumannu,
abbrucia di la menti sti pinseri,
lèvala sta ramigna chi fa dannu
e metti l’erva frisca a li me’ peri.

L’unica cosa, sai, chi mi cunsola
e lu ripetu sempri a tutti l’uri,
sippuru ‘u tempu curri e si ni vola,
lu me cunfortu è unu: “lu Signuri!”

Essennu calmu, iddu, è veru beddu
e fa di specchiu pi lu suli e ‘a luna,
vasatu puru di lu “biancu aceddu”
e li varcuzzi ‘ntunnu pi curuna.

Iddu pi mia è comu un moddu lettu
dunni ci posu tutti li pinseri,
dunni ci trovu paci, lu risettu,
e a li voti ‘a forza a stari ‘n peri!

E mi disiassi essiri un gabbianu,
putiri stari ‘n menzu ‘i so’ biddizzi,
pusata supra ‘u scogghiu chiù luntanu
e notti e jornu aviri ‘i so’ carizzi.

Idda attacca li vini
e ci sbersa la menti,
‘un si scampa pi nenti,
su’ picciotti ‘n catini.

Sta la matri a li cordi
cu la manu ntâ frunti,
cu pizzudda di junti
va cusennu ricordi.

A l’asilu ‘u purtava
cu falari e cistinu,
dintra un virdi jardinu
ddu nuzzenti jucava.

E poi, ‘n colpu di ventu,
lu ramuzzu rumpìu,
p’‘a so strata si n’jiu
ma canciàu sintimentu.

Pi ‘na larma di “duci”,
pi ‘na vugghia pungenti,
chi si perdi? La menti,
p’ogni matri ‘na cruci.

Tutti li me’ capricci accuntintavi
dànnumi di cuntinu lu to affetu;
ogni cuntrarietà m’assistimavi
e la me naca, spissu, lu to pettu.

Novanta su’ ‘i cannili d’astutari;
puru s’‘a testa nun è tutta bianca,
sentu lu cori d’‘a pena attrassari

pirchì si junta vicchiaredda e stanca.
A lu futuru megghiu un ci pinsari,
già sacciu chi ‘u to ciatu assai mi manca.